يا عزيزى كلنا فتايين

هو ليه مصر مش متقدمه فى أى حاجه خالص كده ؟! ، يعنى ولا هى دوله ناجحه فى تطبيق الديموقراطيه ولا ناجحه صناعياً ولا زراعياً ولا اقتصادياً ولا حتى رياضياً.
ده حتى لما قولنا اننا أحسن منتخب فى أفريقيا وقعدنا نشغل " والله وعملوها الرجاله " مصعدناش كاس العالم , مش كده وبس لأ ده احنا خرجنا من افريقيا المرتين الى بعدها !
بس أقولك حاجه لمعلوماتك ، احنا أنجح شعب فى العالم .. آه يا عم أنجح شعب فى العالم !
عندنا 84 مليون خبير وفقيه فى كل حاجه ما شاء الله ، مش كده بس .
احنا عندنا كل واحد مش فقيه فى حاجه واحده بس ، لأ ده كل واحد خبير فى بتاع خمستاشر حاجه ، ملوش تخصص يعنى ، عامله (General) !

كـ سياسياً مثلاً.. 84 مليون واحد بيحللوا خطاب الرئيس من منظور سياسى واستراتيجى ونفسى كمان ، رفع صباعه ( يبقى متضايق ) بص فى الورقه (يبقى مش حافظ وبياخد آوامر) بل صباعه (تبقى ايده ناشفه) .
وممكن كمان بعدها ناس تتوقعلك علاقه اسرائيل وأمريكا بالخطاب ويقولك أمريكا مش عاجبها الخطاب ، اسرائيل بتدين الخطاب ، ما يولعوا هما الجوز !
بعد الخطاب مثلاً ..
لو انت مشهور وكده ، تاخد الطبله بتاعتك وعلى مدينه الانتاج فى أى قناه وتقعد تطبل ، أو هتطلع من غير طبله وعلى مدينه الانتاج وهتقعد تشتم وتشجب وتدين !
ولازم التاتشات البسيطه طبعاً عشان تلم حبه مشاهدين ( زى البنت الى بتشتم شتايم أبيحه على تويتر عشان تلم فولورز ) ويتكتب ع النت فى ساعتها ( افتحوا قناه الفتايين بسرعه شوفوا بيقولوا ايه ) يعنى مثلاً فى نص الكلام تقول اسرائيل رافعه حاله الاستعداد للهجوم على سينا ، أو أمريكا بعتت لاسرائيل فتي شتاشر قنبله بالزمبلك عشان أما تهاجم مصر ، وكله على حساب الشعب الغلبان الى مش فاهم حاجه وبيصدق الاعلام .
أما لو انت مش مشهور أوى فـ يدوبك تويته على تويتر تتكتب عن الخطاب بكل حياديه عشان محدش يعملك أنفولو ويتعملها ريتوييت كتير وتجبلك كام فولور جديد .
أما بقى لو مغمور فـ هتتفرج ع الخطاب وتنزل القهوه تتخانق مع صحابك على مين فى الفقهاء الى قاعدين رأيه الأصح أو هتكتب بوست ع الفيس بيؤيد أو يعارض وبعدها بعشر دقايق تلاقى ميه وعشين كوممنت من فقهاء آخرين برده .
ده أول نوع ، الى هو فقهاء السياسه !

أما لو اقتصادياً شامل الزراعه والصناعه وارشق فيهم قناه السويس ودخل فيهم برده أمريكا واسرائيل أكنك بتضيف التوابل على أكله ماسخه أصلاً ملهاش طعم أصلاً .
مصر مفيهاش زراعه والبلد بتضييع ، لا يا عم دا احنا بنصدر أحسن قطن ، أيوه بس بنستورد قمح ، ماهو عشان المصانع بتعمل ايه وفى مصانع مبتعملش ايه والعمال عاملين اعتصام بيوقعوا البلد ، والاقتصاد مش ناقص ، ده غير قناه السويس الى بقت فى النازل ، وازاى يسيبوا مدمره اسرائيليه تعدى فى القناه ، أيوه ماهو ده اتفاقيه ، بس دى كانت رافعه العلم بتاعها وبلا بلا بلا !
طبعاً مفهمتش حاجه لأن أنا أصلاً مفهمتش منهم حاجه !

أما لو كروياً .. فـ احنا ممكن نكون أول دوله تغزو العالم رياضياً عن طريق تصدير مديرين فنيين لجميع دول العالم .
احنا باسم الله ماشاء الله عندنا 84 مليون مدير فنى ومدربين ، لو لسه مش فاهم قصدى ( انزل اتفرج على أى ماتش فى القهوه ) ، واراهنك انك هتفهم لوحدك .
هيكون يا ماتش من الاتنين يا أما فريقين مصريين واللاعيبه معروفه يا اما فريقين أوروبيين ومش كل الى قاعد عارفهم .
لو الماتش مصرى هتلاقى معظم القهوه منقسمه مشجعين للفرقتين وده عمال يقول للمدرب نزل ده التانى يقوله لأ مينزلش ده المفروض ينزل ده ويطلع ده عشان ده تعبان أوى النهارده ، تعبان مين يا عم انت مشوفتش الاسبرينت الى عمله والفريق التانى وهكذا !
أما لو ماتش أوروبى فـ المدرب المصرى الى قاعد ع القهوه بتنحصر تغييراته فى اللاعيبه الى هو عارف اسمها ، يا رب مايطلع ميسى يا رب ما يطلع ميسى ، ولو مثلاً المدرب عمل تغيير وطلع واحد ميعرفوش ونزل واحد ميعرفوش برده ، أيوه بقى فينك من زمان هو ده الى هيظبط الملعب ( عملاً بمبدأ .. أكيد المدرب أدرى منى !) .

أما بقى الفتايين الاجتماعيين .. يعنى الى بيفتوا فى أى حاجه فى الدنيا تحس ان فى حد هيديله مخالفه لو قال (معرفش) .
 بعد أما فكرت شويه كده فى الفتى الاجتماعى لقيت ان مفيش يوم بيبدأ ويخلص لآخره من غير ما يحصل فيه فتى ، أمك تصحيك من النوم ( قوم يالا الساعه 8:30 ) والساعه لسه مجتش 8 أصلاً تقوم تجرى عشان متتأخرش وتروح تصحى أخوك فتقوله (يالا ياض الساعه 9 ) وتنزل من البيت لو رايح مشوار وعارف الطريق يبقى ربنا بيحبك انه مش هيحطك تحت رحمه الفتى المصرى فى الشوارع .. والموضوع ده اتهرى كتير فى ستاند أب كوميدى وأفلام فـ مش هنتكلم عليه كتير .
أما آخر حاجه فى الفتى المصرى (المترو)  فهو مش وسيله مواصلات ، لأ ده وسيله فتى لا نهائيه ، وبرده ملهمش موضوع معين فبيفتوا ساعتها فى كل حاجه تيجى فى دماغهم ، فـ مش بعيد أبداً انهم يبدأو كلامهم بـ ( ايه رأيك فى جون أبو تريكه امبارح ) وتخلص بـ ( يلا يا ولاد الـ ......) وعلى رأى الراحل جلال عامر (تبدأ مناقاشتنا فى تبادل الآراء السياسيه وتنتهى بتبادل الآراء فى الأب والأم)  وأحب أضيف على كلامه انها مبقتش المناقشات السياسيه بس بقت أى مناقشه بتنتهى بكده .

رأيك يهمنى :D

! كابتن .. آنسه ، فى مقالات تانى فوق ع اليمين .. ادخلوا اقروها !

للمتابعه

http://www.facebook.com/TheWriterShaker

https://twitter.com/AlShaKeRoN

عبدالرحمن شاكر