الأمم الملتحفه

كان يا مكان , كان فيه راجل زمان بيتمشى بسفينه فى المحيط لقى حته أرض نزل فيها وسماها أمريكا وبقى هو مكتشف أمريكا أياً كان هو " كريستوفر كولومبوس ولا أمريجو فيسبوتشى " . 

وكان يا مكان , كان يا مكان , كان يا مكان .. لحد ما بقى فى أرياف جوه بلاد جوه دول داخل قاره جوه كره أرضيه . 

كل واحد اكتشفله حته , كل واحد فتحله بلد وخدها وضع يد , كل واحد خد بلد ويحكمها . 

بس كل واحد من اللى اكتشفوا حته أرض ملهاش لازمه  مقالناش ليه كان وضعها ايه ساعه لما شافها , آه اشطه كانت فاضيه فيها رمله كتير بس موصلناش انه لما دخلها كانت نايمه ولا صاحيه , انا شخصياً أعتقد ان فيه دول كانت مقريفه وحبه تانيين صاحيين وكسلانيين وحبه غيرهم نايمين وبيشخروا كمان !

طب يا ترى الدول الى واجعين لنا دماغنا اليومين دول زى أمريكا وايران كان ايه وضعهم؟! , يعنى من اللى مقريفين ولا من الكسلانين  ولا من الشاخرين النائمين !

ولا أقولك .. بلاش نتكلم ع الماضى ، الماضى ده كان كله جراح !

خلينا فى الحاضر والمعاصر وسلاح التلميذ ! " احم .. آسف " . 

يعنى مثلاً طبقاً لآخر احصائيه بعد انقسام دول واتحاد دول وجو أحمد المسلمانى ده ، عدد دول العالم 230 دوله تقريباً ! 

الـ 230 دوله دول فيهم 229 دوله نايمه من أصل 230 دوله ، هى مش نايمه بس .. لأ ومتغطيه بلحاف كمان .

أما الدول اللى عامله تعبانه فـ بتتغطى بكام لحاف زياده . 

يعنى عندك مثلاً ايران فارشه حبه أسلحه نوويه ونايمه وشاده اللحاف بالقوى ، دول الخليج وليبيا حبه آبار بترول وفوقيهم ملايه ونايمين نوم جماعى .. وهكذا ! 

ونظراً لكثره الدول النائمه فقررت احدى الدول الملتحفه التى تسمى (أمريكا ) بعمل شئ يسمى " مجلس الأمم الملتحفه " ، وعملته متاح لكل الدول ولأى حد ، يعنى باختصار ( كل من هب ودب هيرشق ) بس بشرط صغنطط أد كده اهو انك توافق على ميثاق الأمم الملتحفه ومجلس الأمن يوافق على انضمام ساعدتك لينا كدوله نائمه شاخره وملتحفه ، طب ايه هى الشروط اللى فى الميثاق يا عمو المجلس . 

تبقى من الدول المحبه للسلام ، يعنى تبقى ان آ ريليشن شيب ويز السلام ( أور موقف العاشر ) . 

طب نثبتلك ازاى اننا دوله بنحب السلام , زى ما اسرائيل أثبتت يا بيبى ودخلت ، متبلمش يا حبيبى .. أيوه اسرائيل دوله كيوت ومحبه للسلام ( جداً ) ، وانا الى كنت فاكر ان الكوسه دى مش موجوده فى البلاد الملتحفه راعيه الحضارات والداعيه للسلم والسلام ! 

آه نسيت أقولك ، اسرائيل انضمت بناء على توصيه من مجلس الأمن .

يعنى بالصلاه ع النبى مجلس الأمن الى هو 15 دوله ،ديمقراطياً برده 5 منهم ثابتين مبيتغيروش أبداً الى هما ( أمريكا وروسيا والصين وفرنسا وبريطانيا ) ومعنى ان التوصيه صدرت من المجلس ان لازم الخمس دول توافق على انضمامها ولو واحده بس رفضت .. القرار يتلغى . 

على رأى الله يسامحه عمر سليمان ( وى آر أول بيليف ان ديموقراصى ، بط هوين ؟! )

طبعاً لسه طنطك متعرفش هوين ، نفتخر بكى ماما أمريكا لكونك واحده من مؤسسى الدول الملتحفه ومساعدتهم على التعمق فى النوم أكثر وأكثر ولا تقولى منوم ولا بتاع ، ربانى أهو ! 

يا عزيزى كلنا نيام ( بترول ، نووى ، فلوس واقتصاد ، حبه آثار ) بنحطهم وبننام عليهم ونشد اللحاف ! 

بس المجد كل المجد لكل دوله بتقوم الصبح بدرى بتغسل وشها وبتنطر اللحاف من عليها وتعمل انتفاضه ( سياسيه أو اقتصاديه ) أى انتفاضه وخلاص ! 

المجد لفلسطين الصامده الى بتنتفض ضد الاحتلال 

المجد للصين صاحبه أكبر انتفاضه صناعيه 

المجد لتونس صاحبه الانتفاضات الدائمه فى وجه الظلم 

المجد لتركيا صاحبه أفضل عداله اجتماعيه 

المجد لمصر صاحبه أطول نومه فى التاريخ 

آه بالحق ، مصر هى الدوله الـ230 اللى مش ملتحفه :)

عشان كل أما دوله تقوم وتنتفض مصر تقولها "( عايزه اللحاف ده ؟! ) وتتغطى بيه تانى ، من كتر الألحفه مبقيناش باينين فيها أصلأ

 كابتن .. آنسه ، فى مقالات تانى فوق ع اليمين .. ادخلوا اقروها !

للمتابعه

http://www.facebook.com/TheWriterShaker

https://twitter.com/AlShaKeRoN

عبدالرحمن شاكر