بعدما أثبت فى المقاله السابقه انى كاتب محترف .. نكمل بقى بأسلوب الفخفخينا !
زى ما قولنا فى المقاله الى فاتت " معيار المعايره " هو عنوان موضوع النهارده , يعنى ايه بقى معيار المعايره .
هى كل كلمه لوحدها مفهومه يعنى مثلاً ( معيار : مقياس ) و معايره الى هو بتعاير حد فى حاجه فى شخصيته , على بعضها بقى ( تصدقوا ملهاش معنى ) :O
طب اشطه مش مهم نعملها احنا معنى , انا قصدى بمعيار المعايره الى هو انت بتعاير الناس على ايه أو المقياس الى بتعاير بيه الناس من وجهه نظرك ونظرهم .
لقيت فيه أسباب بالعبيط ( بالعبيط لفظ أدبى برده زى منيله فى أول مقاله ) تبريرات اخوانيه ستايل .. المهم لقيت أسباب كتير أوى عشان الواحد يعايرك أو انت تعاير حد , معظم الأسباب الى أى حد بيعايرك عشانها بتبقى مش بايدك تغيرها أصلاً !
يعنى مثلاً هنقسم المعايره بتاع خمناشر جزء كده .. تسعتاشر منهم اخوان ( انا مالى قالب ع المرشد ليه النهارده ) , يعنى لو جينا خدنا الحياه السياسىه حالياً وتبص عليها هتلاقى كله بيعاير بعضه ..
يا بتوع البردعه عميل أمريكا .. يا بتوع حمضين الناصرى , ده على أساس ان هما ولاد أختى مثلاً
التانى يرد يلا يالى المرشد ممشيكوا ورئيسكوا طرطور , أكيد مش ولاد عمى برده ؟!
عدم اللامؤاخذه انت وهو كده بتعايروا بعض بايه ؟! , بناس عمرها ما فكرت ولا هتفكر فيك الا فى حل من اتنين ..
أولاً : لو قررت تكون كرسى .. رئاسه شورى شعب محافظه , أياً كان مش هتفرق !
ثانياً : لو فيه انتخابات على نفس الكرسى , آه ساعتها هتبقى صاحبى وحبيبى وكفاءه .. تخلص هيبوسك ويحطك جمب نفس الحيط الى كنت ماشى جمبه قبل الثوره !
هلخص عليك هرى كتير فى آيه ومقوله
بسم الله الرحمن الرحيم " ان الله لا يغير ما بقوم حتى يغيروا ما بأنفسهم " صدق الله العظيم
أما المقوله فكانت للزعيم الهندى مهاتما غاندى " كثيرون حول السلطه , قليلون حول الوطن " .
خلى المقوله دى فى دماغك على طول .. والآيه دى اعمل بيها , التغيير مش دهان رصيف بعد 18 يوم فى ميدان ولا كنس نفس الميدان بعد التنحى بيوم عشان الناس تبص " ايه ده ..الله , اتغيرنا " والثوره مقامتش عشان الشوارع بتاعتنا مش نضيفه !
خلى كل يوم فى حياتك ثوره وانت الى تحط أهدافها .. بس ثوره بجد !
أما لو جينا بقى فى المعايره رياضياً .. أهلاوى وزملكاوى !
لو جمهور عادى : احنا أبطال افريقيا فى الكوره , واحنا أبطال أفريقيا فى اليد
لو متعصبين شويه : ايه يا جهلاوى , ايه يا زبلكاوى ..ايه يا لملم , ايه يا زلو , انتوا كده حطيتوا على بعض يعنى !؟
لو أفراد ألتراس : يا بوابين يا ولاد الـ .... فاكرين الدخله الى بوظتوها بتاعه زينه رمضان , يعنى هتبقى أحلى من دخله بديعه !
شويه فشار بقى نتسلى وانتوا كملوا معايره بحاجه مش فى ايديكوا انتوا الجوز !
ده جزء بسيط من المعايره بحاجه مش فى ايدك , معايره بناس بنتبعهم مش هنقدر نغيرهم , بس هنقدر نغير نفسنا ونشغل دماغنا, وده جزء يعتبر جد شويه عن الهلس اللى جاى دلوقتى D:
البنات بيعايروا بعضهم ازاى والولاد بيعايروا بعض ازاى !
مبدأياً الولد مهما يتعاير ولا فى الدماغ أصلاً الا لو زنقته فى حاجتين اتنين بس ملهمش لا تالت ولا رابع هنعرفها فى الآخر , خلينا فى البنات دلوقتى !
بالصلاه ع النبى كده عد معايا " التخن , الميك أب , لفه الطرحه , لون شعرك , لون الشوز , الطقم لو مش براند , الطول والقصر , نفسنه لو حلوه , اللبس لو اتكرر مرتين ورا بعض , مبتقعديش فى كوستا وستاربكس , مبتسمعيش أندرجراوند , معندهاش تويتر "
ده على سبيل المثال وليس الحصر , الكلام ده مش انا الى قايله ده بنات الى قالوه :D (أنا براءه والله )
وبصراحه , ملوش لازمه اعلق عليه , لو قريتوا السطرين دول تانى هتبقى فل أوى .
نيجى للرجاله ..
الراجل مبيتعايرش الا فى حالتين
أولاً : لو عرفت اسم أمه , وكل شويه تقعد تقوله ياض يابن ....... , ده حاجه !
ثانياً : لو اتكشف عليه طبياً وهو بيقدم حربيه أو فى الجيش , والموضوع ده مايتفسرش فهمت كان بها مفهمتش بكره يتكشف عليك وتعرف , والله يكون فى عونه الى هيكشف فى حربيه ويسقط ويكشف بعدها فى الجيش !
دى وجهه نظرى المتواضعه فى " المعايره " , أنا واحد من اللى بيعايروا بعض سياسياً ورياضياً , بس فكرت حبه عشان أعرف مين مستفيد منها سواء سياسياً أو رياضياً بس لقيت النتيجه انى ( مش عارف ) , فى النهايه ولا أنا واخد دكتوراه ولا بحضر ماجيستير عشان تسمع كلامى بس لو فكرت شويه هتفهم قصدى ايه .
كابتن .. آنسه ، فى مقالات تانى فوق ع اليمين .. ادخلوا اقروها !
للمتابعه
عبدالرحمن شاكر
ايه الدماغ العالية دي؟؟ يلا يابو دماغ كبيرة #معايرة
ردحذفحلو بس "الفيس" الاخيرة دي اقفلتني :D
ردحذفaywa b2a .. 7elwa awii ;)
ردحذفانت حتبأة كاتب و لا ايه :D .. برافو عليك استمر
ردحذفساره : " طبعاً فى المقاله انتى شوفتى شاكر المثقف .. بس مشوفتيش شاكر العربجى كنت بقول للرصيف اتاخر عشان انام جمبك هتعايرينى هعايرك " :D
ردحذفDee : مش هتبقى كلها جد بقى , لازم أهلس شويه :D
Nada : Thxx :D
Tanseem : قولى يا رب .. thx :D
حلوةو على فكرة المعايرة برضه معناها تعاير السائل يعني توازنه بحاجة تانية لحد ما توصل لتركيزه ايه(خمسة كيمياء معلش)
ردحذفبص عشان ننقد بصراحة بقى: قوام العلاقات الإنسانية في مصر هو: النميمة!
ولا نميمة بدون معايرة و تريقة، دي عيشتنا إحنا شعب شا..ساااااخر بطبعه..و بالتالي لازم ده هيحصل. ثورة على النفس بقى ده سيادتك محتاج تنسف الاجيال مواليد ما قبل سنة 75 على الاقل و تبتدي تظبط البلد على نضافة بقى. تعليم احسن، قوانين تتغير.
في اجراءات جذرية و بتر زي السكين لازم يتعمل و هو كدة.
الخلاصة البداية لازم تيجي من حد صايع و بلطجي أنه يفرض نضافة مخ على امخاخ.......
.و عشان ابقى صريحة انا بعاير في موضوع لفة الطرح..و بالمناسبة انا مش محجبة يعني لازم بتتفسر إني الصايعة قليلة الادب اللي بتتريق على الحجاب.
في رهان بعمله ان و صاحبة ليا: المزة اللي هناك لابسة كام طرحة؟؟؟
و بعدين واحدة تروح و تسألها لفة طرحتك حلوة قوي معمولة ازاي وبكام طرحة؟
ياريت لما ابعت الرد ده ملاقيش لسه فيه التأكد و الأرقام و الحروف اللي بتتكتب دي
مصر مش هتنسالك اللى بتعمليه فيها ده :D
ردحذفأما عن موضوع نسف الجيل قبل 75 .. معملوش كده فى الصين لما قرروا يقوموا البلد صح بس اتجهوا بكل ما لديهم من علم للأطفال الصغيرين الى هما هيقدروا يطوروها وينقلوا نفس العلم للى بعدهم وهكذا :)
مصر دايرة على حل شعرها من زمان هتفتكر ايه و لا إيه!
ردحذفنسف جيل ما قبل 75 مقصدش بيه أننا نموتهم و لا نلمهم في جزيرة و ننسفها(مع ان في ناس تستاهل) أقصد أن في مهن لازم يمسكها ناس أصغر سناً و أكثر مرونة عقلية.في مهن لازم سن المعاش يكون من 50 ولا 55.كل المهن لازم ميبقاش فيها مد أي سنة زيادة بعد المعاش.
ليه بقى كل ده؟ عشان الأصغر سناً دائماً عنده استعداد يعلم الأصغر منه.لكن لما بيكبر و يوصل لمرحلة عمرية معينة مبيبقاش عنده استعداد مشاركة.
مثلاً في ناس مبتستحملش تشارك العلم مع حد ،أذكر أن في خزاف مشهور(تقريباً نبيل درويش) مشاركش سر المهنة و تركيبات الطلاءات بتاعته حتى مع "أولاده" اللي طلعهم خزافين زيه!و حتى الأرض بتاعته وقفها متحف لأعماله مش لهم يورثوها :)
القصد أن الناس كل ما بتكبر و هي في مناصب بيبقى عندها عبادة الذات زيادة شوية.
و صحيح فين زرار المتابعين على جنب عايزة أعملك متابعة من بلوجر على طول مش هفضل أدخل عن طريق جوجل بلس.
ماهو أكيد مش هنقعد ندور على مين أصلح ومين عنده استعداد يعلم ويستحمل .. لكن لو عملنا زى الصين فى خلال 20 سنه هنبقى محتارين مين ولا مين الى يتولى المسئوليه :)
ردحذف