قريت العنوان وبتقول المثل غلط !
المثل بيقول " مد لحافك على قد رجليك " ، يعنى توفق حياتك واحتياجاتك على أد امكانياتك ، ساعتها هتبقى بنى آدم عادى أو بمعنى تانى هتبقى بنى آدم روتينى زى حوالى 6 مليار واحد تانى بيتعاملوا بنفس المنطق الغبى ده ، طب ما تجرب كده تمد رجللك شويه ، هتخرج عن اللحاف آه ، بس ساعتها هتحس براحه عاليه آوى .. عارف ليه !؟ ، عشان هتبقى فكرت بطريقه مختلفه عن 6 مليار شخص مش بمنطق( خالف تعرف ).
أصل قدامك حل من اتنين ، يا تعيش مخنوق مش عارف تفرد رجلك وماتحسش بالراحه ، يا اما تجيب لحاف جديد طويل يغطى رجلك وترتاح وتفردها براحتك ، المشكله فـ اللى ميقدرش يشترى واحد جديد ، تفتكر الحل ايه !
أكيد الحل عمره ما كان انك تسرق أو تقتل أو حتى تطلع الباسبور وتهاجر بره عشان البلد معندهاش الحفه طويله على مقاس سيادتك .
طب ما تتعب نفسك شويه وتصنع انت لحافك بنفسك ، اللحاف اللى انت عايزه والى هيريحك ، واصنع لحاف لغيرك يحلم فيه برده ، مش لازم تسافر بره وتتغرب عشان تحلم وتحقق حلمك ، الأحلام مبتتحققش على حسب البلد الى انت فيها أو اللى هتبقى فيها ، مصر مش هى اللى بتدفن أحلامك الى انت عايز تحققها ، يمكن يكون فيها عوامل غير اراديه بتساعدك على الفشل ، بس الفاشل هو اللى هيستجيب للعوامل دى ويهرب منها على بره ، والبلاد اللى انت بتحلم تروحها مش هى اللى هتساعدك تحقق اللى انت حلمت تعمله ،الأحلام بتتحقق على حسب الشخص الى بيحلم بيها وعلى اصراره عليها .
ولو مكنش فيه اصرار على تحقيق الحلم بجد عمرك ما كنت هتشوف صوره زى دى ..
ناس قررت من زمان انها تحلم وتحقق ، وناس قررت من فتره قريبه برده انها تحلم وحققت , وناس بتحلم وتتغطى وتنام وبتكمل حلم فى النوم !
عارف ايه الى جايبك ورا .. " خدنا ايه من مصر ، شعب ابن ..... ، عمرنا ما هنتغير " ..
خدنا ايه من مصر .. خدت كتير أوى ، من أكتر الحاجات الى خدتها فخر بيها رغم انها مش الأولى عالمياً فى الاقتصاد ولا أحسن سياسه فى العالم .. بس أكيد فى يوم افتخرت انك مصرى لأى سبب أو نطقت كلمه بتقول " الحمد لله انى مصرى "
افخر بتاريخ وحضاره مصر ، افخر بطيبه أهلها وكرمهم .
افخر بمصر لان ربك أرسل لها سيدنا يوسف ليحفظها من السنوات العجاف، افخر بمصر لان ربك أرسل لها سيدنا موسى ليحفظها من عباده الأصنام ، افخر بمصر لأن ربك أرسل لها سيدنا عيسى عليه السلام بالانجيل ، افخر بمصر لأن ربك ذكرها فى كتابه العزيز ووصفها بالآمنه، افخر بمصر لأن سيدنا محمد - صلى الله عليه وسلم - وصف جنودها بخير أجناد الأرض ، افخر بمصر اللى فتحها عمرو بن العاص ، افخر بمصر اللى طردت الهكسوس ، افخر بمصر اللى صمدت ضد الاحتلال ، افخر بمصر اللى طردت اسرائيل من طابا ، افخر بمصر اللى انتصرت فى 73 ، افخر بمصر اللى قامت بثوره ع الفساد والظلم ، أو ع الأقل افخر بمصر الى خدت كاس الأمم ثلاث مرات حتى .
افخر بأشخاص مصريين زودوا قيمه بلدك قدام العالم ، افخر بـ " مصطفى كامل ، طلعت حرب ، سعد زغلول ، أحمد عرابى ، الشعراوى ، أحمد زويل ، مجدى يعقوب ، فاروق الباز ، طه حسين ، مصطفى محمود ، سعد الدين الشاذلى ، محمود وائل ( أذكى طفل فى العالم ) "
أو افخر بـ أحمد حراره ، نزل يغير بلده راحت منه عين ، كمل تانى وراحت العين التانيه ، ومازال بيكمل ومعرفش حاجه اسمها يأس .. !
الشخصيات الى انت بتفتخر بيها دى مطلعتش باسبور وهاجرت وحققت الى هى عايزاه بره ، ولا باعت اللى وراها والى قدامها عشان تعرف تأقلم نفسها لحد ما تلاقى حد بيقدرهم على مجهودهم فى غسل الصحون .
أما عن الشعب ابن الـ .........
انت واحد منه .. متحاولش تشوف نفسك معندكش غلطه ، لان انت برده بتغلط وانت مش واخد بالك وواحد تانى بيشوفك وانت بتغلط وبسببك انت بيقول (شعب ابن .......) .
مش هعيشك فى الوهم وأقولك البلد فى أحسن حالاتها والشغل على ودنه واقتصادنا منتعش والتوافق السياسى مقطع بعضه ، بس هقولك حاول تغير اللى مش عاجبك فيها ، مش هتتغير فى يوم وليله آه بس هيجى يوم وهتلاقيها اتغيرت وهتبقى أحسن بلد ان شاء الله .
( فاكر نفسك هتغير الكون ) .. لأ مش هغير الكون هغير نفسى و بلدى بس ، أصلى حلفت ومش هصوم تلات أيام ، أنا أما كنت بغنى أغنيه منير ( أزاى ؟! ) أيام الثوره مكنتش بقول " وحياتك " كنت بقول " والله لـ أفضل أغير فيكى لحد ما ترضى عليه "
بس لو انت مصمم انك تحلم بره .. اقطع تذكرتك رايح جاى عشان يوم ما تلاقيها اتغيرت ، ابقى ارجع افتخر معانا ببلدنا الى احنا غيرناها .
أسيبكوا تسمعوا الأغنيه دى !
http://www.youtube.com/watch?v=_GoOg_0Ksa8
كابتن .. آنسه ، أنا كاتب مقالات تانى فوق ع اليمين .. ادخلوا اقروها ورأيك يهمنى !
للمتابعه
عبدالرحمن شاكر