واسأل مجرب عن رمضان زمان

محدش ينكر ان جيل أواخر الثمانينات وأوائل التسعينات شاف أحلى طفوله وداق طعم كل حاجه حلوه ، لا الجيل اللى قبله ولا اللى بعده هيعرف طعمها ، من الحاجات اللى كان ليها طعم مختلف معانا ومفتقدينه حالياً .. رمضان !

رمضان كنا بنستناه بالشهور مش بنتفاجئ بيه قبلها بأسبوعين ، وأما يقرب شويه بنجهز نفسنا ليه بكل حماس مبنبقاش داخلينه بكسل ، كنا بنستقبله بفوانيس بشمع مش فوانيس كرومبو وسبونش بوب ، كنت تسمع من كل بيت فى منطقتك أغانى ( رمضان جانا – وحوى يا وحوى – أهلاً رمضان ) قبلها بشهر ، رمضان اللى مكنش بييجى إلا لو زينه مثلثات وقصاقيص ماليه الشارع وفانوس كبير قُدام كل بيت ، أيام ما كان السحور مبيكملش إلا أما المسحراتى يصحيك بالطبله بتاعته ، ده غير دوره الكوره الرمضانيه اللى بتختلف عن أى كوره لعبتها قبل كده ، رمضان زمان اللى فيه ضرب صواريخ مع المدفع شئ أساسى والفطار مينفعش من غير بكار ، أيام ما كانت الاعمال التليفيزونيه بالنسبه لنا تتلخص فى ( فطوطه – القرموطى – الكاميرا الخفيّه ) مش مائه مسلسل على 30 قناه حالفه تضيع صيامك ، والكنافه متحلاش الا من على الفرن الطوب الأحمر اللى بيتبنى مخصوص فى رمضان بس ، ولمّه العيله أول يوم على الفطار ، والسهره مع صحابك فى المنطقه اللى مبتفضاش من الناس فى أى وقت طول الشهر ، كان شهر لازم نختم فيه القرآن مره على الأقل ومنفوتش ولا فرض ولا تراويح ، رمضان كنا بنودعه بـ ( لسه بدرى بدرى ) وعمل كحك العيد .

رمضان دلوقتى هو رمضان زمان ، احنا اللى اتغيرنا فى استقباله واحنا برضه اللى هنرجعه بروح زمان فى عشر خطوات .. 

1 : ابتدى من دلوقتى شغل أغانى رمضان طول اليوم بصوت عالى يسمّع الجيران .
2 : علّق زينه رمضان وفانوس كبير قُدام بيتك .
3 : اشترى فانوس صفيح ، وياريت لو بشمعه " ده لو لقيته يعنى " .
4 : داونلود لـ30 حلقه من بكار تشوفهم على الفطار ، و30 حلقه من الكاميرا الخفيّه تشوفهم مع الحلو بعد الأكل .
5 : لم العيله كلها عندك أول يوم رمضان 

6 : متسألش حد ( صايم ولا زى كل سنه ؟ ) .

7 : صلِ كل الفروض فى المسجد ومتنساش التراويح ، واختم القرآن مره على الأقل .
8 : اضرب صاروخ كل يوم على المدفع .
9 : اعمل دوره كوره رمضانيه مع صحابك طول الشهر .
10 : متتكلمش فى السياسه طول شهر رمضان .
السنه دى خلى رمضانك مختلف .. واسأل مجرب عن رمضان زمان !

مقالى " ثانويتنا حماها الله " فى عدد مجله كلمتنا الشهر ده بعد أيام ;)

https://www.facebook.com/Alshaker.allash

https://twitter.com/AlShaKeRoN

عبدالرحمن شاكر