بدأ بعض من راغبى الشهره وعديمى الموهبه بعد الثوره مُمارسه حريه من نوع جديد وهو تسجيل مقاطع فيديوهات مُفقده للمراره ونشرها على اليوتيوب لاصابتنا بالشلل التام ، بدايهً بـكاسى نبيل التى أصبحت مُحلِله سياسيه على قناتها فى اليوتيوب بعد الثوره تتناول الأحداث الساسيه وتحللها تحليل سياسى من وجهه نظرها ( ميخرش الميه ) ، وتبعتها منذ فتره الأخت الفاضله هديل على التى هرتلت فى بعض المواضيع العامه ومحاوله تعديلها واضافه ( الطاطش بتاعها ) ، فبدأت أولى تسجيلاتها بانتقاد الجيش المصرى وطريقه معامله المجندين بدايهً من تقديم الأوراق اللى الانضمام .
أخذتنا معها فى حديثها الى رحله سخيفه حول التجنيد كما تتمنى هى أن تراه ، فملخص ما قالت " تخيلوا الجيش هوتيل مش هقول فايف ستارز ولكن ليه ميكونش ثرى ستارز .. غرف مُكيفه بسريرين ، كل أوضه فيها حمام ، وياريت لو يكون فيه شيف وفيه أوبشنز للأكل زى الطيارات ويقدمولهم أكل ( نديف ) مش هقولك كافيار بس أكل مصرى عادى ويكون ( نديف ) ، وليه المكان اللى هما عايشين فيه ميكونش فيه أوضه بلايستيشن أوضه بولينج أوضه بلياردو سويمينج بول جاكوزى وجيم ، وليه برده ميكونش فيه كافيهات و شيش بحيث ان هما بعد التدريب ليه مش يخرجوا عشان مش نحسسهم انهم محبوسين ، والتدريبات ليه ميبقاش فيها ملاعب باسكت ملاعب تينس ملاعب جولف ، وليه ميقسموش الجيش يخلوه جزء هاى كلاس وجزء ميدل كلاس وجزء لوو كلاس ؟! " .
عزيزى القارئ .. علينا وضع بعض الحلول السريعه للقضاء على هذه المشكله ( الجيش مفيهوش ملاعب جولف .. مُتخيّل الكارثه ) ، مش بس كده لأ ده كمان مفيهوش كافيهات ولا شيش نروحها بعد التدريب اللى هنتدربه فى ملاعب الباسكت وملاعب التينس والجولف ( فيه كبت كده ! ) ، وبالنسبه لغرف البلايستيشن والبلياردو و البولينج اللى هيكسب الدوره ممكن نديله اعفاء ؟! ، ولكن برغم اقتراحتها الرائعه لا يمكننا انكار المعلومات التى افحمتنا بها مثل أخوها الذى ذهب ليحضر ( ورقه اللى ملهوش جيش من حته كده اسمها سته جُند ) ، فكانت هى أول مره أعرف فيها ان ( السته جُند ) منطقه .
ربما نسيت هديل انتقاد بعض السياسات فى التجنيد مثل ( اللبس ) .. ليه ميبدلوش اللبس المُموّه بسويت شيرت بينكى مرسوم عليه تويتى من اتش آند ام ونخلى الجيش يتعاقد مع شركه كونفرس ونلغى البياده خالص ، وكمان فوق ده كله مفيش مكان جوه الجيش نرسم فيه تاتوو مثلاً .
وكما هى على لسانك حالياً أن تنطِق بها ( وأما نروح نحارب بقا ) .. أما نروح نحارب نطلب وقت مُستقطع فى نص الحرب عشان عمو القائد يقولنا الخطه ، ده غير أنه أكيد هيبقا لينا لانش بريك وكوفى بريك فى نص الحرب ، أما بقا اللى هيستعمل حاجه أخطر من مُسدس خرز هنطلعه بره الحرب ومش هيحارب معانا تانى .
ما أفحمتنا به الأخت بالطبع لن يتحقق داخل المؤسسه العسكريه ، ومع ذلك لن تجد رجلاً يتمنى أن يكون هذا هو حياته العسكريه ، ربما هو تجنيد يتمناه من يذهب لاحضار ( ورقه اللى ملهوش جيش من حته كده اسمها سته جُند ) ، متهيألى لو كانت فتحت فيديو تدريب للجيش كان زمانها فقدت النطق ومكناش شوفنا الهلس ده .
وبالرغم من استحاله تحقيقه ، فلن يُجدى مع جيل يبذل أقصى ما بوسعه داخل التجنيد حتى لا يعايره زملاؤه عند الاخفاق بترديد " ياض يا فرفور ! " .
للمزيد من الشلل شوف الفيديو بنفسك : http://www.youtube.com/watch?v=zrES0LFEtz0
للمتابعه
عبدالرحمن شاكر
تعجبني وجهة نظرك ، لا تعير اهتمام لمثل هؤلاء الذين يعيشون علي هامش الحياة الحقيقية ( لقد خلقنا الإنسان في كبد ).
ردحذفوكما هى على لسانك حالياً أن تنطِق بها ( وأما نروح نحارب بقا ) .. أما نروح نحارب نطلب وقت مُستقطع فى نص الحرب عشان عمو القائد يقولنا الخطه ، ده غير أنه أكيد هيبقا لينا لانش بريك وكوفى بريك فى نص الحرب ، أما بقا اللى هيستعمل حاجه أخطر من مُسدس خرز هنطلعه بره الحرب ومش هيحارب معانا تانى .
ردحذفالحتة دى ضحكتنى بجد .. استمر و بجد اسلوبك جديد و مبتكر )Y)
Mohamed Ghorab : تسلم :)
ردحذفالمتمرده : شكراً جداً :)
hhhhhhhhhhhhhhhhhhhhhhhhhhhhhhhh 7elwaa d7ktnee b2a :D
ردحذفأى خدمه بقا :D
ردحذفاحقاقا للحق الفيديو مكتوب عليه ف الدسكربشن انه للهزار بس ..... بس دا ميمنعش ان المقال اكتر من رائع وقتلنى ضحك .... استمر وربنا معاك :)
ردحذفعلى فكره دى اتكتبت من قُريب ع الفيديو والكوممنتات ع الفيديو نفسه تثبت ده :) ، بغض النظر عن كل ده .. شكراً :)
ردحذفشكلك متعرفش حاجه عن الجيش ولا التجنيد
ردحذفبصرف النظر عن الهبل اللي هي قالته و انت بترد عليه ...
المجند اجباري بيصرف على الجيش من جيبه عن طريق الكانتين اللى بيخش جيوب الظباط الكبار
اكل العساكر كيفا و كما و طريقه توزيعه غير ادميه
اكل غير مكلف تماما و قليل و نادرا لو لقيت بروتين و بيبقى قليل جدا
اللبس و الخدمات الاداريه مفيش
خدمات طبيه أو علاج مفيش الا لو بتموت خلاص و بمنتهى اللامبالاه
خش نام
وايه علاقه ده بالمكتوب ان شاء الله ?! :D
ردحذف